Davao City – Dismayado ang usa sa mga organisasyon sa mga mamumuo sa nasud kang Pres. Rodrigo Duterte kay imbes haw-ason sa kalisud ang mga kabus mas gitumpawak naman hinoon sa kalisdanan tungod sa ‘Tax Reform for Acceleration and Inclusion’ kun TRAIN law nga nagpa-usbaw sa buhis sa pipila ka produkto sama sa petrolyo.
Nasakitan si Sentro Labor Organization Mindanao Coordinator Rodel Labor sa gihimo ni Pangulong Digong tungod wala na gani natuman ang panaad, mas gipasamutan pa hinoon ang kalisod sa katawhan gumikan sa pagsapupo unya sa epekto sa TRAIN Law nga gikunsidarang ‘anti-poor’.
Gikabalak-an ni Labor ang dili mapugngan nga pagsaka unya sa mga palaliton lakip na ang pag-usbaw sa pletehan gikan sa 8.00 pesos ngadto na sa 15.00 pesos sa PUJ ug 50.00 pesos nga flagdown rate sa mga taxi gumikan sa excise tax sa petrolyo.
Ug gumikan sa epekto sa TRAIN law, angay matud pa wagtangon ni Pangulong Duterte ang regional wage board ug himoong managsusama ang sweldo sa mga trabahante sa tibuok nasud sa punto nga wala ray kalainan ang presyo sa mga palaliton sa kauluhan ug dinhi sa atong dapit.
Gikatakdang hisgutanan sa sunod semana sa mahitabong panagpulong sa Sentro Labor Organization ang pagpangayo og dugang 150 pesos nga matag bulan nga suhulan alang sa mga mamumuo.
Mao lang kini ang bugtong pamaagi aron makasugagod ang yanong mga mamumuo sa pagmahal sa mga palaliton diin nanganti ang mao nga grupo nga posible maglusad sila og lihok protesta batok sa gobyerno ug sa TRAIN law sa umaabot nga mga adlaw.
Dugang pa ni Labor nga dakong bakak ang gipalanog nga rason sa gobyerno mahitungod sa katuyuan sa TRAIN law tungod dili kini alang sa mga proyekto ug mga program sa administrasyong Duterte inay gamiton ang income sa dugang buhis sa pampabayad sa utang sa Pilipinas sa China.
RadyoMaN Joel Viray
