Davao City – Naglibog pa karon si Gabriela Partylist Representative Emmie De Jesus kung unsa kaha gayod ang rason ngano gihulipan si Pastor Ernie Abella isip Presidential Spokesperson.
Nagdula karon ang hunahuna ni De Jesus sa matuod nga hinungdan sa kalit nga pagkasipa ni Abella gikan sa katungdanan isip tigpamaba ni Presidente Rodrigo Duterte.
Apan sa tan-aw sa magbabalaud nga posible nalisdan na si Abella sa paghatag og katin-awan sa publiko sa komplikado ug kontrobersiyal nga mga pamahayag ni PRRD.
Samtang gi-almahan ni De Jesus ang nahimong basehan ni Pangulong Duterte sa pagkatudlo ni Attorney Harry Roque isip sunod mupapel sa pagka-presidential spokesperson.
Wala matangyi sa militanteng magbabalaud ang gisulti ni PRRD ngano gusto niini nga si Roque ang ipuli kang Abella kana tungod pareho sila maha-it manulti manulti.
Giila sa congresswoman ang maayo nga track record ni Roque ug gani aminado kini nga siya mismo nakasaksi sa mga accomplishment sa pagka-abogado sa bag-ong tigpamaba sa pangulo sa nasud.
Busa nanghinaot si De Jesus nga mapasabot og maayo ni Roque ang kontrobersiya unya nga mga istorya ni PRRD aron matin-awan ang publiko sa buot ipasabot sa mga pulong sa Pamuno-nasud.
Segun ni Emmie De Jesus, karon nga opisyal na nga tigpanalipod ang kanhi kongresista kang PRRD siguro wala na kini nabiling dungog ug kredibilidad sa International Human Rights Advocates.
Butang nga dakong hagit sa bahin ni Roque aron iyang pamatud-an nga takos pa gihapon kining tawgong Human Rights Defender bisan paman og siya na ang musalo sa mga isyu nga ibato batok kang Digong.
RadyoMaN Joel Viray
