TALISAY CITY, NEGROS OCCIDENTAL – Naglab-ot sa halos isa ka oras ang pagpamulong pulong ni Pangulong Rodrigo Duterte sa iya pagtambong sa ground breaking ceremony sang Vista Alegre Homes sa Brgy. Dos Hermanas, ciudad sang Talisay pasado las 5 kahapon sang hapon.
Sa iya nga speech, ginpalayag sang pangulo ang may kaangtanan sa Pabahay Program sang gobierno subong man ang paghatag sang P100 million pesos nga pundo sa tagsa ka bulan sa Philippine General Hospital ukon PGH.
Gintalakay ni Duterte ang issue sa West Philippine Sea.
Nahibaluan nga ang Vista Alegre Homes ang isa gid lamang sa madamo nga mga housing projects sang gobierno pinaagi sa National Housing Authority para sa mga miembro sang PNP subong man sang military.
Kapin isa ka libo ka mga 2-storey nga duplex type nga housing units ang natalana nga igapatindog diri.
Sa pihak nga bahin, nag-abot man kahapon sa probinsya si PNP Chief, Director General General Oscar Albayalde.
Ginpangunahan naman ni Albayalde ang command conference sang Negros Occidental Provincial Police Office.
Nagapanguna nga ginhingyo sang director general sa mga kapulisan amo nga dapat ini sila ang mangin disiplinado./PIO Talisay photo
