Davao City – Gikatakdang makighimamat si Pres. Rodrigo Duterte karong adlawa sa kapulisan sa Ozamiz City aron subling ma-engganyo ingon man ipataas ang morale sa mga ‘fighting troops’ sa gobyerno sa kampanya kontra kriminalidad, droga ug terorismo.
Sugaton ang pamuno-nasud karong hapon ni Police Chief Insp. Jovie Espenido, hepe sa kapulisan sa Ozamiz diin sundan gilayon kini sa ‘Talk to Troops’ sa presidente kuyog sa tropa sa kapulisan sa Ozamiz kinsa nilandig sa taas nga publisidad gumikan sa operasyon kontra droga diin napatay mismong ang alkalde sa maong dapit Mayor Reynaldo ‘Aldong’ Parojinog, kapikas niini ug pipila ka mga kakaubanan.
Si Parojinog apil niadtong natala sa unang drug list ni Duterte diin gilatid ang pangalan sa mga ‘narco politicians’ apil ang ilang mga police protectors.
Usab ang pangulo personal nga mopasidungog sa mga ‘Medalya ng Kadakilaan’ (PNP Heroism Medal) sa pito ka mga outstanding police operatives sa latest anti-drug operations sa syudad.
Sundan usab kini sa extemporaneous message ni Duterte diin gilaumang subli niyang hatagan sa ‘marching orders’ ang nasudnong kapulisan sa nagpadayong war on drugs.
Una niini, nagbahad ang presidente nga personal niyang bisitahon ang mga pulis sa Ozamiz aron adunay pasidunggan apan aduna usay sitahon kun bigwasan sama niadtong gigamit lamang nga ‘protectors’ sa pamilyang Parojinog sa ilang iligal nga binuhatan sa nanglabay’ng katuigan.
Saksihan usab sa presidente ang pagsusi sa mga armas de fuego nga nasakmit sa mga awtoridad sa ninglabay’ng mga law enforcement operations sa Ozamiz PNP.
Kasamang June Duterte
