Gitakda karon nga makigtagbo kang Pres. Rodrigo Duterte ang namugna nga inter-agency arson investigation team aron ihikyad ang mga detalye ingon man madunggan ang dugang pang mga kamanduan sa pamuno-nasud kalabutan sa NCCC Mall fire tragedy investigation.
Mga tinubdan nagtug-an nga ang maong grupo pinangulohan ni retired AFP Chief-of-Staff Eduardo Año gikatakdang mopahibalo sa presidente sa inisyal nga mga datos nga nakuha sa pasiunang imbestigasyun sa pinakadakung sunog una pa nanamilit ang 2017.
Sa maong mapait nga insidente, 38 ka mga personahe sa SSI business process outsourcing company ug sa NCCC nakabsan sa kinabuhi sa insidenteng naglimin sa daghang pangutana.
Segun sa atong mga tinubdan, inisyal gitumbok ang faulty electrical wiring nga posibleng hinungdan sa dakung kalayo apan daghan pang pangutana ang wala matubag pananglitan tinood ba nga wala moganar ang emergency alarm system sa maong pasilidad, walay water sprinkler system, walay full-enclosure exits ug walay automatic fire suppression system ang SSI.
Gani, inisyal nga nakwestion sa probe team nganong nakabaton man ug Fire Safety Inspection Certificates (FSIC) ang nasangpit nga mall ug ang BPO company taliwala sa daghanang mga bayolasyon niini.
Usab gisipa na ang lima ka mga opisyales sa Bureau of Fire Protection (BFP-XI) kalakip ang hepe sa maong buhatan dinhi gumikan sa kapakyas nga mapatuman ang mga lagda sa fire safety standards diin nisangpot sa kamatayon sa 38 ka mga tawo niadtong December 23, 2017.
RadyoMaN June Duterte
