Davao City – Usa sa gihulat ug maayo karon sa katawhan dinhi sa habagatan mao ang gikatakdang pakigpulong ingon man opisyal nga mensahe ni Pres. Rodrigo Duterte atol sa 1st Bangsamoro General Assembly didto sa Sultan Kudarat.
Mga tinubdan nagkanayon nga mahinungdanong madunggan sa tanan ilabi na sa mga Mindanaoans kun unsa ang tubag niini sa gikasugyot nga revised Bangsamoro Basic Law (BBL).
Kagahapon, nahiusahan sa unang adlaw nga deliberasyon nga pangayoon ang commitment sa Duterte administration nga paluyuhan ang nasangpit nga inisyatiba alang sa pagkab-ot sa malungtarong kalinaw nga natugaw sa deka-dekada nang konflikto denheng dapita sa nasud tali sa gobyerno ug sa mga Moro freedom-fighters.
Kritikal usab nga madungog ug masayran sa tanan ang konkretong direksyon sa iyang pamunuan sa hisgotanang awtonomiya sa Mindanao alang sa nahibiling katuigan sa iyang termino.
Kahinumdoman nga unang na-unsyame ang BBL sa dihang nasango kini sa lebel sa Camara Baja ug sa Senado gumikan sa hugot nga pagsukit-sukit ingon man oposisyon sa mga magbabalaud kinsa dili ‘sold-out’ sa pagtunol ug halapad nga poder alang sa ilang kaugalingnan.
Mga anti-BBL legislators nangatarongan nga ang pag-surrender sa pipila ka mga gahum ngadto sa usa lamang sa pundok malagmit mosangpot unya sa pagkasi-ak si-ak sa atong archipelago.
Mga pro-BBL hugot hinoon nagdason nga kini na ang talagsaong kahigayunan aron ang mga anaa sa poder mo-korehir sa mga kasaypanan ug kakulangon kun ‘historical injustices’ nga nasinatian sa mga Moro.
Usab gi-atngan sa kadaghanan ang mamahimong mensahe sa pamuno-nasud karong hapon atol sa Grand Opening Ceremonies sa 6th ASEAN Boy Scouts Jamboree sa may Energy Park, Apokon, Tagum City.
Ang regional scouting activity subling nagbutang karon sa Tagum City, ang ‘Gold Capital of Davao Region’ diha sa international map ug global radar ingon man nagtunol ug oportunidad aron ma-improbar ang imahe sa habagatan ngadto sa international arena.
RadyoMaN June Duterte
