Davao City – Dili na kumbinsido pa si Presidente Rodrigo Duterte nga ipadayon ang peace talks tali gobyerno ug CPP-NPA-NDFP.
Atol sa speech niini sa Barangay Summit on Good Governance Regio-XI gisaway sa pangulo ang gideklarang unilateral ceasefire sa maong teroristang grupo.
Gibatbat sa presidente nga human nga nagdeklara ang CPP og ceasefire nagpadayon gihapon ang ilahang pagpangatake.
Gikapungot sa pangulo ang gihimong pagpangatake sa Sorsogon ug pagpatay sa asawa sa usa CAFGU.
Subay niini gimando ni Duterte sa mga IPs nga palig-onon pa ang ilahang pagbantay sa ilahang ancestral domain ug iyaha kining armasan.
“Walay makasulod diha kamoy mugwardiya walay laing tribu, wala tanan inyo na. Ingon ko Matigsalug diri. Ingnon nako ang military ug pulis nga magkooperate mo diha lang mo sa inyong lugar, pabantayi lang nga maabot sila ngadto unya pusila dayon,” sumala sa pangulo.
Samtang, pabor man si Datu Lipatuan Joel Unad, chairman sa MIPCEL, nga armasan ang mga lumad apan ipailawom usa kini sa pagbansay.
“Dili awtomatik nga pinusilay kinahanglang adunay ginatawag local peace negotiation kay tribu, tribu mana dili mana ingon nga lain pa nga tao. Ang amoa diha mag-establish mi og kulturanhon mga sistema sa pakig-istorya sa mga rebelde nga tribu pod,” sumala ni Unad.
RadyoMaN Aimee Guinita
