Davao City – Hambugero ug mapahitas-on: Kini ang reaksyon ug komento ni Gabriela Partylist Representative Emmie De Jesus sa bag-ohay lamang nahuman nga 4th State of the Nation Address (SONA) ni Pres. Rodrigo Duterte.
Nahambogan si De Jesus kang Duterte tungod kay daghan sa iyang mga gitaho sa ika-upat nga nasudnong report kagahapong adlawa dili tinuod ug wala matuman.
Sama na lamang sa saad niini nga humanon ang suliran sa droga sulod lamang sa unom ka bulan apan nagtulo na lang ka tuig sa pangatungdanan, wala gihapon matuldukan ang problema sa iligal nga droga.
Usa sa gipasigarbo ni Duterte atol sa iyang SONA mao ang 6M ka mga Pilipino nga nahaw-as na gikan sa kalisud.
Apan gikontra kini sa militanteng magbabalaud sanglit tinuod nga daghan ang nakagawas na sa kalisud, apan ang kamatuoran mao nga daghan sa gihapon sa mga Pilipino ang nagkamang sa kapobrehon.
Gibigwasan usab niini ang walay kahumanan ug kuyanap nga kurapsyon sa administrasyong Duterte luyo sa kampanya batok sa kurakotism sa mga salawayong opisyal ug empleyado sa kagamhanan.
Matud ni De Jesus, kun aduna man silay dili malimtan nga legasiya ni Duterte kana mao ang pakyas nga mga saad sama sa drug war, paghaw-as sa kalisud, grabe nga pagpangawkaw ug daghan pang uban.
Daku ang kahigayonan nga mahugno ang trust and approval rating ni Duterte sulod sa nahibilin nga tulo ka tuig niya sa katungdanan diin si De Jesus mihatag og bagsak nga grado sa amahan sa nasud.
Wala usab palabya sa batikos sa congresswoman ang pagpamugos ni Duterte nga buhion pag-usab ang death penalty batok sa mga malambigit sa droga ug sa makahimo og heinous crime lakip ang plunder.
Sa tan-aw pa ni De Jesus, kung dili mag-undang sa hambog ang kasamtangang amahan sa nasudm, hayan dili gayod kini makahuman sa iyang termino nga gikatakdang matapos sa tuig 2022.
RadyoMaN Joel Viray
