Davao City – Gihulagway ni Gabriela Partylist representative Emmie De Jesus si Presidente Rodrigo Duterte nga mas masahol pa ikumpara sa gisundan niini nga mga administrasyon.
Matud ni De Jesus nga daw nag-asta Marcosian style si PRRD gumikan sa posibilidad sa pagsunod sa mga tunob sa kanhi diktador nga mahimong ‘One-Man Rule’ sa nasud.
Nagsumikad ang dili maayo nga tan-aw sa magbabalaod kang Digong human gibuhian niini ang iyang bahad nga i-crackdown ang teroristang CPP-NPA-NDF ug ang mga militante.
Gikaguol ni De Jesus ang pag-usab sa panan-aw ni PRRD sa NPA kay kaniadto dihang mayor pa kini kanhi ka-istorya man niya ang mga komunista apan karon terorista na ang iyang pag-ila.
Gibatbat ni De Jesus nga si Digong pa gani mismo ang mi-ila sa lehitimo nga pakigbisog sa CPP-NPA-NDF kuyog sa kaalyado nga mga militante kinsa nangandoy kuno og kausaban sa katilingban.
Aminado ang Gabriela Partylist nga mibati sila og kabalaka karon tungod sa posibilidad nga lakip sila apil gukdon human gibalik sa listahan sa mga terorista ang CPP-NPA-NDF.
Karon nga nakaamgo na si De Jesus, wala matago niini ang iyang tumang kadismaya gumikan kay dili na mao ang Duterte nga ilang nailhan kaniadto sa dihang wala pa kini nahimo nga pangulo sa nasud.
Sumala niini, sukad midaog ug milingkod sa gahom si PRRD nahubo na usab ani ang mascara ug nadayag ngadto kanila ang tinuod nga nawong sa kanhi mayor.
Kung tinud-on ni PRRD ang pagpagawas og executive order nga magdeklara sa CPP-NPA-NDF nga terorista wala na kuno’y kalainan si Digong kang Macoy nga diktador.
Kahinumduman, subli mi-ulbo ang kaspa ni PRRD gumikan sa nahitabo sa upat ka bulan nga bata nga namatay sa pagpamanhig sa mga komunista sa patrol car sa Bukidnon pipila na ka adlaw ang milabay.
RadyoMaN Joel Viray
