Kapin sa 400 ka mga residente sa Barangay Bugo ang naserbisyohan sa dxCC-RMN Cagayan de Oro ug lokal nga kagamhanan sa Cagayan de Oro atol sa dxCC-RMN Live sa Barangay kaganihang buntag.
Nahatagan og kahigayonan ang mga residente nga mapaabot ang ilang mga hangyo o reklamo ngadto sa mga opisyal sa Barangay Bugo ug syudad.
Human sa Live Program uban ni RadyoMaN Zaldy Ocon, gihimo usab ang tabang medico ni Mayor Oscar Moreno.
Sa maong higayon napahimuslan sa katawhan ang nagkadaiyang serbisyo sa local nga kagamhanan lakip na niini ang medical check-up, ibot sa ngipon, libreng tambal, libreng reading eye glasses, libreng arroz caldo, libreng pagrehistro sa mga wala pay birth certificate, libreng philhealth registration ug daghan pang uban.
Lima ang nakadaog sa tag 200 pesos sa gihimong pa raffle sa dxCC-RMN ug usa ka gatus ang gigahinan og gift packs.
Daghan usab ang nalipay sa dihang nakasalmot sa padulang Kwarta o Ashigo nga niabot na sa 35-mil pesos ang jackpot prize apan pakyas gihapon ang taga Bugo sa pagkuha niini.
