Gidagsa sa katawhan sa Barangay Tabon ang gihimong dxCC-RMN Live sa Barangay kaganihang buntag.
Gibana-banang kapin sa usa ka libong mga residente ang misaksi sa kalihukan ug nakapahimulos sa mga libreng serbisyo nga gitunol sa dxCC-RMN uban ang lokal nga kagamhanan sa Cagayan de Oro.
Nahatagaan og kahigayunan ang mga residente nga mapaabot ang ilang mga hangyo ngadto sa mga Barangay Officials ug Department Heads sa City Hall nga gipangunahan ni Oliver Egypto, Head sa Office for Community Affairs.
Human sa pagpaabot sa mga concerns, napahimuslan sa katawhan ang libreng medical check-up, libreng tambal, ibot sa ngipon, Birth Certificate Registration, Philhealth Registration, libreng reading eye glasses, consultation alang sa mga nanginahanglan og operasyon ug dunay libreng arroz caldo.
Lima ka mga residente ang nakadawat og tag 200 pesos atol sa pa raffle sa dxCC-RMN ug usa ka gatus ka mga tigpaminaw sa dxCC ang nagahinan sa gift pack.
Lakip sa mga winners sa tag 200 pesos mao silang Celestino Ebare, 65 anyos, taga Purok 9, Tablon, Rudy Olango, 51 anyos, taga Purok 12, Thelma Pabayda, 66 anyos, taga Purok 4, Elsa Eduria, 63 anyos, taga Purok 8 ug Ma. Magnolia Arnol, 46 anyos, taga Purok 3, Barangay Tablon.
Samtang karong Biyernes, Disyembre 7 sa buntag laing dxCC-RMN Live sa Barangay na usab ang himoon sa Barangay 28 ning syudad sa Cagayan de Oro.
