Davao City – Sa bulan sa Disyembre karong tuiga, pinasahi nga sorpresa ang hatod sa team sa DXDC RMN Davao alang sa mga suking tigpaminaw sa sibyaanan.
Personal gayud nga miadto sa panimalay sa mga avid listeners aron manaygon ang inyong kinaham nga mga radio personalities sa DXDC.
Apan inay nga ang gipanaygonan ang muhatag, kami mismo ang nanghatag og gasa, diin usa ka espesyal nga Noche Buena package ang among srpresang dalit ngadto kanila.
Dili masukod nga kalipay ang makita sa ilang panagway samtang sila gibisita ug gi-awitan.
Ang DXDC Panaygon usa lamang sa daghanang mga aktibidad matag tuig sa inyong paboritong estasyon sa radyo diha paghatud sa kalingawan ug kasadya sa mismong panimalay sa mga suking tigpaminaw.
Kini gawas pa sa lab-as nga balita, serbisyo publiko, nindot nga mga drama, programa ug kalingawan sa mga barangay, pa-promo, ug uban pa.
Ug una pa man manamilit ang tuig 2019, dakung kalipay sa among kasing-kasing ang inyong walay puas nga pagpaminaw ug pagsuporta ning inyong kinaham ug numero unong AM radio station sa habagatan, ang DXDC 621 RMN Davao!
Hangtud sa sunod pang katuigan, kamo gihapon ang among kauban, among kasama! Kamo gayud, Kasama ang tinuod nga number one!
RadyoMaN Kirby Manzon
