Gibutyag ni Precious Manliguez, Mental Health Specialist and Consultant sa PMHA Davao, gikonsidera nilang alarming ang ihap sa suicide cases sa dakbayan.
Matud niiini, mamahimo kining mapugngan ang paghunos sa kaugalingong kinabuhi kung nasayod gayod ang mga nakasinati’g mental health problem ug issues nga naa silay kadangpan ug kapangayuan og tabang.
Sa datos nga gipakita ni Manliguez atol sa DXDC RMN Davao ‘Relationships & Mental Health’ sa Mental Health Symposium, nakatala og 53 deaths by Suicide ang Davao City niadtong 2022, 7 kun 13.21% sa mga biktima mga babae samtang 46 o 86.79% ang mga lalaki, diin pinakabata sa mga biktima nag edad og 11 anyos ug 70 anyos ang pinakatigulang.
Atol sa Valentine’s Day special symposium gihatagag duot ni Manliguez dili lang ang relasyon sa mga kapares apan pati na ang relasyon diha sa pamilya, katrabaho, higala, isig katawo ug sa mga kabatan-onan kansang gaporma pa og mga relasyon sa komunidad.
Gipahibalo niini sa publiko nga gatanyag og libreng konsultasyon ug counseling ang PMHA Davao Chapter ug City Government of Davao nga pweding kadangpan sa mga adunay giatubang nga mental health problem.
Kinahanglan lang nga boluntaryong mupailawom ang kliyente sa iyahang kaugalingon aron epektibo ang intervention kanila.
Gikinahanglan usab pakusgan ug ikanaog sa mga barangay level ang mental health advocacy diin sagad usab daghang mga naapektuhan ang mental health.
Kagahapong adlawa, mukabat sa 200 ka mga estudyante sa University of Mindanao gikan sa College of Arts and Sciences Education, Nursing ug Structural Engineering and nisalmot sa aktibidad ug gihatagan usab sila’g higayon nga makita personal ang pwersa sa DXDC RMN Davao.
RadyoMaN Aimee Guinita
