Davao City – Una pa man hingpit gipatuman sa nasudnong gobyerno ang pag-ban sa paggamit og electronic cigarettes kun vapes sa tibuok nasud pinaagi sa Executive Order 106 nga gipagawas ni Pres. Rodrigo Duterte, ang lokal nga kagamhanan sa syudad sa Davao nag-implimentar na niini hapit na 18 anyos ang nakalabay.
Gani, human sa napulo ka tuig, ang Davao City Council nag-amyenda sa ordinansa sa tumong nga ma-expand ang Comprehensive Anti-Smoking Ordinance 2012 diin ubos sa bag-ong ordinansa, ang paggamit sa e-vape apil nang gidili sa dakbayan.
Gipasabot ni Vice Regulation Unit (VRU) Head Ashley Lopez nga ilawom sa gi-amyendahan nga ordinansa, ang e-vape gikunsidera na siyang sigarilyo tungod sa aso niini nga daw walay kalainan sa tinuod nga sigarilyo.
Katuyoan sa Comprehensive Anti-Smoking Ordinance of 2012 ang pagpromotar og hinlo ug de-kalidad nga hangin maingon man maayong panglawas ug kaayohan sa katawhan.
Matud ni Lopez, kasagaran sa madakpan sa paggamit og e-vapes mao ang mga Hapon sa katarongan nga buot silang mag-undang sa panigarilyo ug makalikay sila sa mga balatian.
Apan dakung sayop ang pagtoo sa uban nga ang e-vapes dili makadaut sa panglawas apan ang tinuod. kuyaw ang sakit nga dad-on ngadto sa tawo tungod sa mga kemikal nga anaa niini sama sa nicotine.
Gi-ehemplo ni Lopez ang 15 anyos nga batan-on didto sa Cebu kinsa namatay sa sakit nga mugna sa electronic cigarettes diin gibarugan sa opisyal nga dili gayod maayo ang e-vapes nga gamiton sa tawo.
Suportado karon sa VRU Head ang direktiba ni Duterte nga idili sa na sa tibuok nasud ang paggamit og electronic cigarettes gumikan sa hisgotanang maayong panglawas ug sanidad sa katawhan.
RadyoMaN Joel Viray
