Kalibo, Aklan — Patay rong sangka eaeaki matapos nga maeomos kaina it agahon sa irigasyon sa may Brgy. Linabuan, Norte, Kalibo, Aklan.
Ro biktima nakilaea kay Rezen Santiago, 44-anyos, naga trabaho sa refilling station it tubi ag tubong Madalag pero presente nga naga istar sa nasambit nga barangay.
Suno sa anang asawa nga si Gemma Aurellio nga kaina nga agahon hay naghambae ro biktima nga maligos sa irigasyon bago umadto sa anang ubra pero ginhambaean nana raya nga sa bomba lang maligos ugaling nagpilit ro biktima nga ma eonip eang it makadali.
Nagbutwa mat-a rayon daya ag nagpungko sa eatay, anay kat ginapasakat eon imaw ay gasuoed pa sa ubra uman raya nga eomonip.
Nagbooe imaw it sabon sa andang baeay apang sa anang pagbalik uwa eot-a kitaa ro biktima rason nga andang gin usoy ag nakita man sa may unahan kon sa siin nakita ro anang tsinelas.
Ginpatakas ag gin aplayan man nanda it first aid ag ko ulihi gindaea sa Aklan Provincial Hospital pero uwa gid matabangi.
Ginakangaw-an man makaron ni Gemma nga ko ham-an naeomos ay antigo ma raya magpaligos ag taga dughan malang man ro tubi.
Nasayuran nga kung may hang-over ro biktima hay nakaugalian nana nga magpaligos sa irigasyon.
