Davao City – Walay kasegurohan nga mamahimong hapsay ug magmalinawon ang kasaulogan sa katawhan sa Pasko ug Bag-ong Tuig.
Gani, dili maka-garantiya ang Eastern Mindanao Command (EASTMINCOM) nga walay enkwentrong mahitabo tali sa militar ug sa CPP-NPA-NDFP inig abot sa adlaw sa Pasko ug Bag-ong Tuig.
Ugaling mu-ulbo ang giyera tali sa militar ug sa NPA, kabahin lamang kini sa hugot nga seguridad nga gipatuman sa militar sa kabukiran, sumala ni Eastmincom Spokesperson Lt. Col. Ezra Balagtey.
Giklaro ni Balagtey nga layo ra sa peligro ug dili matugaw ang katawhan sa pagselebrar ning kapaskuhan.
Dugang ni Balagtey nga dili magkumpiyansa ang kasundaluhan bisan og nagdeklara na og unilateral ceasefire ang rebeldeng hut-ong busa 24 oras nga alerto ang tibuok puwersa sa militar aron dili maatakihan sa mga NPA.
Hinoon, gikunsidera sa EASTMINCOM nga ‘isolated cases’ lamang ang nahitabong raid sa NPA sa detachment sa lalawigan sa Agusan del Sur diin duha ka sundalo ug kapin napulo ka mga CAFGU auxiliaries ang gibihag sa rebeldeng pundok.
RadyoMaN Joel Viray
