Davao City – Gibalik ni David Xyz Callena ang dungog sa Ginoo human kini nag-top 1 sa Electronic and Communications Engineering Licensure Examination niadtong Oktubre 2021.
Si Callena taga Tagum City, Davao del Norte nga migradwar sa University of Southeastern Philippines (USeP) – Davao City, diin nakakuha kini og 92.80% rating sa exam subay sa resulta nga gipagula sa Professional Regulation Commission (PRC).
Sa interbyu sa DXDC RMN Davao kang Engineer David Xyz Callena, dako nga pabor gikan sa Kahitas-an ang pagpanguna niini sa mga examinees luyo sa mga pagsulay sa pagtuon ug bisan sa duha ka higayon nga kanselasyon sa exam tungod sa pandemya.
Gibutyag ni Callena nga nag-enroll siya sa Review Center apan online lamang kini tungod sa restriction o pagbawal sa face-to-face review.
Nahimong inspirasyon niini ang iyang pamilya sa pagpaningkamot sa pag-eskwela ug pagkab-ot sa iyang pangandoy.
Gipasabot usab sa top notcher nga angay hatagan og importansya sa tawo ang spiritual nga aspeto ug bunos na lamang ang mga panalangin ug kadaugan dinhi sa kalibutan.
“Do not let the world or the achievement nga mag-define sa atoa kay the world ang its achievements kay diri lang na siya padulong, temporary lang gyud. Ang pinaka-importante is the spirituality. Whatever you achieve in this world counts for nothing kung walay eternal life, and there is eternal life through Jesus Christ who is the way, the truth and the life,” matud ni Callena.
Plano usab ni Callena nga itabang sa pamilya kung adunay ihatag nga insentibo ang eskwelahan tungod sa paghatag og dungog sa unibersidad.
Samtang, trivia usab sa top notcher sa iyang pangalan nga David naggikan sa Bible character nga si King David ug Xyz nga second name tungod kay usa ka Mathematics teacher ang iyang inahan.
RadyoMaN Kirby Manzon
