Jamindan, Capiz – Hugot nga ginakondena sang pamunoan sang 3rd Infantry (Spearhead) Division nga nahamtang sa Camp Peralta sa banwa sang Jamindan ang pagsunog sang ginapahayag mga membro sang terrorist CPP-NPA sa Brgy. San Martin, Dumalag, alas 2:50 sang hapon sang nakaligad nga Abril 24, 2018.
Base sa statement nga ginpaguha sang 3rd ID, ginsiling ni Brigadier General Dinoh Dolina, ang pagsunog sang roller compactor(pison) nga gina-usar para sa pagkay-o sa mga dalanon sa nasambitan nga barangay ang isa ka klaro nga indikasyon sang ginatawag nga economic sabotage. Pinaage sini “ginapamatud-an nila nga sila ang anti-people, anti-development kag anti-peace.”
Dugang pa sini nga “They refuse being tagged as terrorist, yet their action clearly shows that they are indeed, terrorists.”
Sa mahibaloan nga base sa imbestigasyon sang mga kapulisan, ang nasambitan nga equipment ang ginapanag-iyahan sang S.T. Salcedo Construction Corporation.
Sa nasambitan nga oras sang insidente, suno sa operator sang pison nga si Leodegario Futotana Jr., nagabutang ang mga ini sang aspalto kaupod sanday Ronde Araso kag certain “Putot Laho”, sang nagpalapit ang walo ka mga armado nga kalalakinhan kag sila ang ginpangtutokan sang armasluthang.
Ginhambal pa sang mga ini nga “UPOD NIYO TO? INDI SIYA MAANO SA NPA AH! CONTRACTOR LANG AMON KAY WALA NA NAGABAYAD”,
Ginbubo-an sang mga ini sang tatlo ka gallons sang gasolina antes nga ginsindotan.
Ginpalukpan pa sang mga ini ang windshield sang pison antes nga nagpalagyo sa direksiyon padulong sa banwa sang Jamindan.
Nahibaloan nga base sa Section 3 sang Republic Act 9372 ukon ang The Human Security Act of 2007, ang krimen kaangay sang pagsamad ukon ukon krimen nga napaidalom sa Presidential Decree no. 1613 (The Law on Arson), pareho sang pagsunog sang equipment ukon arson, ang ginakabig nga “Crime of Terrorism.”
