Maga personajes del Philippine Coast Guard ya agaunta con un estrangero salido de Egipto mientras muntao na un lancha ta biaja para na Isabela City enantes aga.
Conel Egyptian ya conose como si Mohammed Shabaan Abdelaziz, con quien ya aguanta el maga otoridad alas 6:30 del aga mientras ta espera ya cuantos minute para larga el lancha para na Isabela City.
Asegun con Lt. Noriel Ramos, del Philippine Coast Guard-Zamboanga Station, ta conduci sila el que se llama Mandatory Pre-Departure Inspection cuando ya puede sila columbra con el mencionao estrangero.
Inicialmente el estrangero tiene violacion del que se llama “over stay” na paiz despues ya descubri que su visa hasta del Julio del año pasao solamente.
Na intravista con Ramos na DXRZ-RMN Zamboanga, ya habla le base na diila invetigacion con Abdelaziz, ya llega le na paiz del Febrero12, 2017 y ya apunat le na Marawi City donde ya tene le esposa na Labason, Zamboanga del Norte.
Hasta ya sosede el Marawi Siege nohay mas dao asegun le puede man renew consu visa.
Del mas reciente ya tene asegun diutay negocio si Abdelaziz y aye raga anda era le na Maluso, Basilan para compra pumpboat.
Pero porcausa dudable su movimiento donde nuevo lang tambien ya tene encuentro el maga soldao y maga Abu Sayyaf na Maluso, y porcausa pasao ya el visa di Abdelaziz, ya tene que pone conele bajo na investigacion.
Este maga tiempo ya coordina ya tambien el PCG con el International Police para continua el investigacion con Abdelaziz.
