Davao City – Hitsas na ang tanang aktibidad sa muslim community alang sa mahitabo nga Eid’l Adha karong adlawa, July 31, 2020.
Matud ni Uztadz Mamoud Adilao nga dunay dakong kalahian ang dagan sa ilang aktibidad karong adlawa ikumpara sa naandan nilang buhat sa Eid’l Adha nunot sa COVID-19 diin mahimong sentro sa usa ka oras nga pangaliya mao ang kasulbaran sa COVID-19 pandemic karon.
Segun ni Adilao nga kung kaniadto ginahimo ang Eid’l Adha sa Agro Football Field sa may Bolton Isla, karong tuiga himoon ang ilang tinuig nga pag-ampo sa mga mosque na lamang.
Istrikto usab ipatuman ang health protocols sama sa physical distancing, pagsuot og facemask ug muabot lang sa 50% ang tugutan makaapil sa tapok aron malikayan ang pagtakod-takod sa virus.
Suma ni Adilao, sa Barangay 23-C Gym himoon ang pag-ampo nga magsugod sayo sa buntag.
Wala usab sila nagdawat karon og mga bisita samtang ang tradisyonal nga pag-ihaw sa karneng baka ibalay-balay na ang pag-apud-apod niini.
RadyoMaN Joel Viray
