SYUDAD sang Iloilo – Ginakabig nga “dying” na ang ekonomiya sang Guimaras halos isa ka bulan matapos ang nagluntad nga Iloilo Strait tragedy.
Ginpahayag ni Mr. Fred Davis, spokesperson snag grupo nga Hugpong Guimarasnon, dapat na nga maaktuhan sang Guimaras Provincial Government lakip na sang national government ang immediate concern sa epekto sa palangabuhian sang mga Guimarasnon.
Isa na diri suno kay Davis ang nagakatabo sa sulod na sang duha ka Sabado sa merkado sang Barangay Mc Claine sa Buenavista, Guimaras nga halos wala na sang nagabakal sa mga baligya.
Dapat man suno kay Davis nga mabalik sa normal ang biyahe ilabi na ang isyu sa paglukot sang trapal kag ang masami nga pagpa-untat sang biyahe sang mga sakayan sa Iloilo Strait.
Bwas nga adlaw, Setyembre 3, las 6 sang gab-i magahiwat ang grupo sang synchronized candle lighting activity sa mga pantalan sa syudad sang Iloilo kag probinsya sang Guimaras.
Bukas sa tanan ang aktibidad nga nagatuyo sa pagpabati sa national government sa problema sang probinsya sang Guimaras bangod sa epekto sa ekonomiya sa paghugot sang seguridad sa mga pumpboat.
Photo via Province of Guimaras FB
