Davao City – Pabor ang Mindanao Migrants Center for Empowering Actions, Inc. sa sugyot-balaudnon nga diborsyo nga bag-ohay pa lamang napasar ug nakalusot sa committee level sa House Committee on Population and Family Relations.
Matud ni Inorisa Elanto, MMCEA Executive Director, ang mag-asawa kinsa wala na magkasinabot angay nang bulagon pinaagi sa pagduso og diborsiyo isip legal nga aksiyon.
Nagtoo si Elanto sa importansya sa pagpreserba sa kaminyoon apan kun ang magtiayon mismo pareho nang walay kalipay sa ilang panag-uban sulod sa usa ka panimalay, nan may igo nang rason aron ilang konsiderahon ang last option nga absolute divorce or bin ba kaha dissolution of marriage.
Ang House Committee on Population and Family Relations ilawom ni Albay Representative Edcel Lagman nag-aproba sa consolidated measures nga House Bill # 100, 838 ug 2263 kun Marriage Dissolution Bill.
Ang House Bill #100 una nang giduso ni Lagman niadtong April 2018 ug gibanhaw pag-usab niadtong July 2019 ubos sa 18th Congress diin ang marriage dissolution pareho ra usab sa diborso sa ubang kanasuran.
Wala magsilbi ang pagbabag ni CIBAC Partylist Representative ug Deputy Speaker Eddie Villanueva sa Divorce Bill human nga kadaghanan sa mga kongresista miboto pabor sa pagbulag sa mga magtiayong wala nay maayong relasyon.
Sa tibuok kalibutan, bugtong ang Pilipinas ug Vatican na lamang ang mga estado nga hangtud karong panahona, wala pa mag-awtorisa sa diborsiyo.
Ang Kongreso magmugna na karon og Technical Working Group (TWG) nga pamunuan ni Lagman alang sa legislative consolidation nga gikatakda karong February 11.
Sumala ni Elanto, una tugtan ang magtiayon nga makaduso og diborsiyo, angay ihatag una ang tanang remedyo ug sulayan una og sumpay pagbalik sa ilang nagkayuri nga relasyon ug sulbaron una ang ilang problema hangtud makaya pa.
Apan kung dili na gayod matabang pa ang nagkamaot nga panagkuyog, diha pa sila angay tugtang muhimo og legal nga pamaagi aron ilang tapuson na ang puno sa suliran nga relasyon.
RadyoMan Joel Viray
