Election posters wala sa designated areas, gisugdan na og baklas sa COMELEC

Davao City – Hingpit nang gikasa sa COMELEC DAVAO CITY ang “Operation Baklas” batok sa mga campaign materials nga wala sa designated areas karong buntag lang.

Kauban sa COMELEC Davao City ang DENR, DPWH XI, kapulisan, ug Task Force Davao diha sa paglusad og “Baklas Operation” diin matod ni Buhangin Police Station Chief of Police Major Joenel Pederio, ang Barangay Buhangin ug Barangay Cabantian ang punting karon samtang sa Agdao District karong hapon.

Pero gitin-aw ni COMELEC XI Acting Regional Director Atty.Gay Enumerables, ang “Operation Baklas” lakang kini sa COMELEC Davao City tungod kay ang Nationwide Simultaneous “Operation Baklas” sa entero nasod mahitabo pa karong adlaw’ng Biyernes.

Gipasabot ni Enumerables nga ang kadtong mga kandidato nga dunay daghang mga posters mabaklas maoy pasakaan og diskwalipikasyon ug mismo ang mutindog nga reklamante mao ang COMELEC.

Dili na makamahay ang mga kandidato sa lakang karon sa COMELEC gumikan naghatag na og tulo ka adlaw ang maong buhatan aron ilang tanggalon ang ilang mga Election Posters, apan daghan kanila gahi og ulo ug wala musanong sa komunikasyon nga gipadala ngadto kanila.

RadyoMaN Joel Viray