Davao City – Adunay 251 ka mga barangay ang na-identipika isip Election Watchlist Areas (EWAs) sa Davao Region.
Kini ang gipamahayag ni PRO-XI spokesperson PCI Milgrace Driz atol sa gipahigayong AFP-PNP Presscon karong adlawa diin mibutyag kini nga dili pa nila pwede ipagula ang listahan sa mga espesipikong lugar.
Sa ilang record, adunay 55 ka mga barangay ang natala alang sa Davao City, 44 sa Davao del Sur, pito sa Davao Occidental, 50 sa Davao Norte ug 68 sa Compostela Valley Province kinsa ang pinakataas sa listahan.
Gani sa tibuok rehiyon sa Davao, adunay napulo ka mga barangay ang ilawom sa Category 1 diin mao kini ang mga lugar nga aduna nay natala nga seryosong panagbangi sa politika ug ang posibilidad nga mag-hire og pribadong armadong grupo samtang 241 ka mga barangay ang anaa sa Category 2 diin adunay serious armed threats ug presensiya sa mga rebeldeng grupo.
Giklaro sa tigpamaba sa PRO-XI nga gibalidar na kini sa parehong Armed Forces of the Philippines (AFP) ug Philippine National Police (PNP) ug ginahulat na lamang nila ang approval sa Commission on Election (COMELEC) aron kini mapagula.
Gipasabot ni Driz nga basehan kini sa ilang ipatumang security measures diin mas doble sa mga na-identipika nga mga barangay.
Kun itandi, mas taas ang numero sa EWAs karong tuig gikan sa 230 sa milabay’ng 2016 election.
RadyoMaN Jason Amisola
