Davao City – Nangayo karon og konsiderasyon ang mga konsumante sa Davao Light and Power Company kun DLPC nga lugwayan usa ang payment sa electric bill subay usab sa epekto sa COVID-19 sa Davao.
Sumala sa pipila ka mga konsumante sama sa usa ka alyas Jing nga taga Matina ning syudad, hinaut niini nga magpatuman og 30-day payment extension gikan sa ilang due date ang DLPC.
Samtang sa pakighinabi sa DXDC RMN Davao kang DLPC communication officer Ross Luga, sa karon wala pa kini impormasyon bahin sa kausaban sa collection sa kumpanya apan gipasabot niini nga walay angay kabalak-an gumikan sukad pa kaniadto, dili dayon nagaputol og linya sa kuryente ang DLPC sa mga dili dayon makabayad.
“Ang Davao light ever since, 2 months man ayha muputol. With COVID or not, naa na ng 2 months sa DLPC as compared sa uban nga putol dayon… ever since 2 months man na, 3 months pa gani, ang uban 4 months… As far as kung duna bay kausaban (collection or payment), I do not have the answer to that yet,” segun ni Luga.
Sa karon nag anunsyo ang DLPC pinaagi sa ilang official facebook page nga mamahimong makabayad ang mga konsumante pinaagi sa Davao Light’s online collection partners sama sa GCASH, BDO, Paymaya ug uban pa.
RadyoMaN Renz Barbarona
