Davao City- Gituuhang electrical short circuit ang hinungdan sa ikaduhang sunog nga natala karong tuiga nga nahitabo kaganinang alas 4 sa kadlawun sa Block 3 Spring Valley Buhangin ning syudad sa Davao.
Kini sumala pa sa fire investigator nga si SFO2 Segundo Dumasig jr. subay sa ilang inisyal nga imbestigasyon.
Sumala pa, usa ka balay ang nasunog nga gipanag-iyahan sa pamilyang Rodenio gani daling napalong sa kabomberohan ang kalayo ug wala na mikaylap sa laing kabalayan.
Sa pakighinabi pod ngadto sa tag iya sa balay nga si manong Armando namat-an na lamang niya nga puno na sa aso ang iyang balay ug dili gayud kalikayan nga mabalaka tungod kay naglisod na matud pa siya og ginhawa tungod sa aso.
Dugang niini, nakurat na lamang ang pipila ka mga residente sa lugar kay miulbo na matud ang kalayo sa atup sa maong balay ug nagtinabangay sila nga mapalong ang kalayo pinaagi sa tubig sa kanal gani daling miresponde ang kabomberohan ug gideklara nilang fire out alas 5:30 na sa buntag.
Hinuon walay natalang casualty sa maong insidente apan gibana-banaang anaa sa 20, 000 ang damyos sa unang sunog nga natala sa Buhangin Fire Station ug kini na ang ikaduhang sunog nga natala sa pagsugat sa bag-ong tuig.
RadyoMaN Paul Canono
