TALISAY CITY, NEGROS OCCIDENTAL – Gintiro patay sang isa ka security guard ang isa ka electrician sang isa ka eskwelahan sa ciudad sang Talisay sini gid lamang nga aga.
Nakilala ang biktima nga si Rey Bico, 40 anyos ang edad kag pumuluyo sang Had. Mana-ol, Brgy. Matab-ang, Talisay City.
Ini siya ang nakaangkon sang pilas tuga sang pagtiro sa iya dughan kag li-og nga amo naman ang gintunaan sang iya kamatayon.
Samtang ang suspek naman amo ang security guard sang Green Gold Security Agency nga si Harold Taniongon, 59 anyos ang edad, pumuluyo sang Brgy. E. Lopez, Silay City.
Ginpahayag nga ang biktima kag ang suspek ang lunsay naga-obra sa Colegio San Nicolas de Tolentino-Recoletos formerly University of Negros Occidental-Recolectos de Talisay.
Ang insidente natabo may mga las 7:30 sini gid lamang nga aga sa sulod sang amo nga eskwelahan.
Isa sa ginalantaw nga motibo amo ang ginaalegar madugay na nga away sang biktima kag sang suspek./dyHB BACOLOD
