Pagasuguran na subong nga semana ang pagpanghatag sang emergency shelter assistance ukon ESA sa mga pamilya nga nagub-an sang balay sa nagluntad nga magkasunod nga linog sa Itbayat, Batanes sang Sabado nga adlaw.
Ginpat-od ni Presidente Rodrigo Duterte nga makabaton sang 60 mil pesos nga ESA ang mga pamilya nga totally damaged ang balay samtang 30 mil pesos naman ang partially damaged.
Nahibaluan nga 15 ka balay sa banwa sang Itbayat nga sentro sang linog ang totally damaged kag posible nga madugangan pa samtang padayon ang assessment sa lugar.
Samtang nagpangako man si Duterte sang 40 million pesos nga bulig pinansyal para sa pagkay-o sa mga naguba nga infratsructura sa lugar.
Ginpahulag man sang pangulo ang tanan nga ahensya sang gobyerno agud masiguro nga madasig nga mapalab-ot ang bulig sa mga apektado nga residente.
Kon madumduman nga nagluntad ang una nga pag-uyog nga may kabaskugon nga magnitude 5.0 alas 4:16 sang Sabado sang kaagahon nga may apat nga patay kag ginsundan alas 7:38 sang aga nga may kabaskugon nga 5.4 magnitude kag nagbilin man sang apat nga patay kag may 63 ka mga napilasan.
Photo © 98.5 i-FM Cauayan <www.facebook.com/DWKD985Cauayan/?__xts__%5B0%5D=68.ARBMqnFsRpGNaVf1FAix7lSGF6dVYM26vXEHOXig9UJHtny-2SYYpULLs-KkHbnZHtuQEx2U0C92it5i8KzreZ–00uIlS7YfovkmFnRGcn1_3-_GEK6Lw1pdzhuENbEqZA8yVYCajdQiEerEd…>
