Davao City – Mas palapadan pa karon sa Disaster Risk Reduction Management Council ang information drive labot sa mga emergency siren ngadto sa kabarangayan sa rehiyon onse.
Sa ingon masayod ang katawhan hilabi na sa mga nanimuyo sa coastal barangay sa mga emergency siren aron makabantay sila kung dunay kalamidad muhampak.
Subay niini, makig-alayon ang RDRRMC 11 sa mga opisyales sa kabarangayan aron mapaspasan ang pag-edukar sa mga residente sa lahi-lahi nga klase sa emergency siren aron dili masaypan og sabot.
Sumala ni RDRRMC 11 Training Officer Marvin Samson, importante mahibalo ang tawo sa mga early siren aron makabantay sila sa magsingabot nga kalamidad sama sa tsunami ug linog.
Segun ni Samson nga ilang gikuhaan og leksiyon ang Indonesia nga nadelatar ang pagpatingog sa siren maong gatusan ang namatay ug nasamdan tungod sa sobrang kumpiyansa sa pag-igo sa tsunami.
Bisan tuod og natabunan sa Samal ang Davao City ug pipila ka bahin sa rehiyon apan dako gihapon tsansa nga mahitabo ang tsunami sa atong dapit kay nag-atubang sa pasipiko ang dakong bahin sa rehiyon.
Gikumpirma pa ni Samson nga walay mga bulkan ilawom sa dagat sa rehiyon apan tungod sa Philippine trench posible gihapon masinati ang tsunami kung mutay-og ang ilawom sa daga sa rehiyon.
Aduna usab fault lines ang Sarangani area, Davao Oriental nga posebling tinubdan unya sa tsunami ugali magdungan og lihok kini sama niadtong 1930’s sa Governor Generoso nga mikitil og daghang kinabuhi.
Naplastada ang mga emergency siren sa Toril, Agdao, ug Lasang ning dakbayan ug moderno na sab ang mga kagamitang pangkalamidad nga ginagamit sa lokal nga kagamhanan.
RadyoMaN Joel Viray
