Davao City – Nagtoo karon si First District Councilor Joselle Villafuerte nga may lama sa kamatuoran ang unod sa usaka world survey nga ang mga Pilipino lakip sa mga rasa sa tibuok kalibutan nga grabe ka emosyonal sa aspetong feelings kun pagbati.
Segun ni Villafuerte, dili lamang ang mga Pilipino ang ‘most emotional’ apan ang tanan nagbaton gayud og hiyas sa kalipay ug masakitan usab ang pagbati kung masamaran ang kasingkasing.
Apan talagsaon ang mga Pilipino sanglit bisan og unsa pa kabug-at sa problema, makahimo gihapon kini sa pagpahiyom, dugang sa magbabalaud.
Aminado ang konsehala kinsa usaka medical doctor nga ang ubang mga tawo malisud makadawat sa mga problema ug tungod sa grabe nga emosyon, nahulog na hinoon kini sa sakit nga depresyon diin ang uban nagapakamatay.
Apan sa kinatibuk-an, makasulti si Villafuerte nga ang mga Pilipino adunay lig-on nga klase sa emosyon nga bisan taliwala sa daghang mga pagsulay, padayong positibo ang ilang pagpanglantaw sa kinabuhi.
Makamao mubati ug maluoy ug andam mutabang sa mga nanginahanglan labaw na kung ang naggilaid sa mga pagsulay mga kabanay ug pamilya butang nga wala sa ubang rasa sa ubang kanasuran.
Pahimangno lamang ni Villafuerte nga batasanon gayud ang pag-istorya sa mga suliran aron dili mahulog sa stress ug depresyon ug aron malikayan ang pag-abot sa punto sa paghunos sa kinabuhi sama sa gihimo sa ubang ‘emotionally stressed.’
RadyoMaN Joel Viray
