Dead on arrival sa ospital ang driver sang motorsiklo sa nagluntad nga vehicular accident sa Brgy. Liwanay, Banga, South Cotabato, alas 7:45 kagab-i, Marso 23, 2021.
Ginkilala ang biktima kay Rexor Lagdamen Torre, 33 –anyos , single, Bio-tech employee, driver sang Kawasaki Bajaj bilang V1 kag residente sang Purok 1, Brgy. San Vicente, Banga, South Cotabato.
Gindala pa sa South Cotabato Provincial Hospital ang biktima apang gindeklarar nga patay sang attending physician.
Base sa mga nakakita, aksidente nga nasideswipe suno pa sang Isuzu Forward Truck ang motorsiklo sang biktima nga nangin kabangdanan nga nadulaan ini sang kontrol kag natumba sa sementado nga dalan.
Apang base sa maid-id nga imbestigasyon sang Banga MPS, wala sang pamatuod nga imbolbado sa nasambit nga insidente ang Isuzu truck nga ginamaneho ni Richard Segura Sangyon, 44-anyos kag residente sang Sitio Ong Ante, Brgy. Liwanay sa nasambit nga banwa, amo nga ginrelease nila ini ,kundi may lain nga salakyan nga imbolbado base naman sa naggwa nga testigo.
May-angot sini, nagapatigayon sang pursuit operation ang Banga MPS sa posible lokasyon sang imbolbado nga salakyan.
