Iligan City- Nalandig sa tambalanan ang usa ka biktima sa pagpamusil bandang alas 3 ang takna sa kahaponon sa may Barangay Mahayahay ning dakbayan sa Iligan.
Ang biktima motubag sa pangalang Arip Buat y Lumondot 37 anyos minyo usa ka draftsman sa DPWH ug molupyo sa may P.N Roa sakop sa dakbayan sa Cagayan de Oro.
Sumala pa sa imbestigasyon sa kapulisan sa Presento 4, nga samtang nagsakay ang maong biktima sa iyang sakyanan , paghidangat sa intersection area sa Barangay Mahayahay, dala ang kwarta niini nga gi withdraw nga mubalor sa kapin sa usa ka milyon ka pesos, kalit lang kini nga giatangan sa tulo ka mga suspetsado nga sakay sa usa ka motor.
Kalit lang matud pang gi abrehan sa usa sa mga suspetsado ang pultahan sa sakyanan ug dayong gipusil ang maong biktima sa tiyan nga bahin niini .
Ang mga suspetsado daling misibat sa wala matinong direksyon dala ang kwarta nga kapin sa 500thousand pesos.
Narekober sa kapulisan ang kwarta nga mubalor na lang sa 500 thousand pesos gikan sa possesion sa biktima.
Matud pa sa kapulisan, nga posibleng robbery hold-up ang motibo sa maong panghitabo.
Padayon pa karon nga nagpa alim sa samad pinusilan ang maong biktima samtang padayon usab ang imbestigasyon sa maong kaso.
-RadyoMan Weller Digao-
