Davao City- Arestado ang usa ka empleyado sa gobyerno human naaktuhang namaligya og gituuhang shabu sa brgy. Poblacion, Sta. Maria, Davao Occidental kagahapon, alas 4:40 sa hapon.
Giila sa Philippine Drug Enforcement Agency kun PDEA XI ang dinakpan nga si Artolo Avila Fetalino alyas Antoy, 39 anyos, residente sa San Isidro, Magsaysay Davao del Sur ug usa ka liason officer sa League of Municipalities sa Phil-Davao Occidental Chapter.
Sa gipahigayong buy bust operation sa PDEA XI ug pinaagi sa usa ka PDEA agent nga nagpaka-aron ingnon buyer, napalitan og usa ka pakete si Antoy sa gituuhang shabu nga mubalor sa 2,000 pesos ug narekober usab sa iyang possession ang 500.00 buy-bust marked money ug usa ka cellphone.
Sa karon, balhog na sa PDEA Detention Facility ang dinakpan.
Gina-andam na usab sa buhatan ang kasong ipasaka batok sa suspek nga mao ang pagsupak sa Section 5 ug Section 11, Article II sa Republic Act 9165 kun Comprehensive Dangerous Drugs Act of 2002 samtang gi-sumiter na ang nasakmit nga gituuhang shabu sa Laboratory Service sa PDEA office alang sa qualitative ug quantitative examination.
Gani og mapatud-an nga guilty sa maong buhat ang empleyado, ipahamtang kaniya ang maximum penalty ug posibleng mag atubang og lain pang silot subay sa Article II, Section 28 nga Criminal Liability of Government Officials and Employees sa Republic Act 9165.
RadyoMaN Renz Barbarona
