Davao City – Dakong factor ang dili maayo nga tratamento sa mga kumpanya sa ilang mga trabahante ang pagbagsak sa job satisfaction sa mga mamumuo subay sa gipagula nga survey result dili pa lang dugay.
Gawas niini, ang kagamay sa sweldo ug pagmahal sa mga palaliton usa sab sa mga rason ngano mibati ang mga trabahante og ubos nga job satisfaction sa ilang mga trabaho karon.
Sumala ni Sentro Labor Organization focal person Michael Ybanez, ang kabato sa pagbati sa mga tag-iya sa mga kumpanya sa kahimtang sa mga trabahante rason ngano dili malipayon ang kadaghanan sa ilang trabaho karon.
Daghan sa mga trabahante karon wala gihapon muangat sa estado sa ilang trabaho human nagpabilin gihapon nga casual ug contractual samtang dyutay lang ang anaa sa regular status nga naglipay sa dako nga sweldo ug mga benepisyo.
Matud ni Ybanez nga unang mahayon sa kahimtang sa mga trabahante karon mao ang mga kumpanya kay nagpalingog-lingog sila sa pagsunod sa labor laws ug ka-inutil sa Department of Labor and Employment (DoLE) sa pagprotekta sa interest sa mga mamumuo.
Wala na sab matingala si Trade Union Congress of the Philippines (TUCP) Davao chapter officer Reynante Billones ngano wala matagbaw ang mga mamumuo sa ilang trabaho kana tungod pakyas gihapon ang DoLE sa pagwagtang sa ‘endo’ mao nga daghan gihapon sa mga trabahante nagpabilin sa estado nga casual.
Pareho wala giwala sa duha ka labor leaders ang posibilidad nga basin dunay working attitude problem ang mga trabahante apan dili nila mabasol kun dili maayo og taras ang uban sanglit pareho wala gihimo sa mga employers ug DoLE ang ilang mga responsilibidad alang sa kaayohan sa mga mamumuo.
RadyoMaN Joel Viray
