Isa ka rebelde ang napatay sa engkuwentro sa tunga sang mga katapo sang CPP-NPA kag 61st Infantry Battalion sang Pjilippine Army nga nagluntad kahapon sa Sitio Butuan, Barangay Igcabugao, Igbaras, Iloilo.
Ini matapos nagresponder ang tropa sang mga suldado sa report nga may mga armado nga tawo sa lugar kon sa diin ginpaulanan sila sang luthang sang mga terorista nga grupo nga nagresulta sa engkuwentro nga naglawig sang halos 30 minutos.
Suno kay Lt. Col. Sisenando Magbalot, Commanding officer sang 61ST IB nga sa ginhiwat nga pursuit operation, nasapwan sang mga suldado ang isa ka patay nga lawas nga ginpahayag ginbilin sang mga rebelde sa ila pagpalagyo.
Nakuha man sa lugar ang IED, bandolier sang 5.56 mm, kag tatlo ka galon sang gasolina.
Samtang 9 ka mga miyembro sang NPA ang nadakpan kasunod sang engkuwentro kag karon yara sa custody sang Igbaras PNP.
