Davao City – Nagpadayon karon ang operasyon sa kasundaluhan human sa engkwentro tali tropa sa gobyerno ug New People’s Army kun NPA sa Sitio Bayongon, Barangay Astorga, Sta. Cruz, Davao del Sur niadtong adlawng Sabado, Abril 21 nga miresulta sa pagkamatay sa duha ka NPA ug pagkaaresto sa usa ka amasona.
Sa report gikan Police Regional Office kun PRO XI, naglusad matud pa ang 39 th Infantry Battalion Philippine Army og combat patrol operation sa dihang naengkwentro ang kapin kun kulang 30 ka mga miyembro sa Guerilla Front 51 (GF 51), Southern Mindanao Regional Committee.
Giila ang usa ka namatay sa kampo sa NPA nga si Julito Pueblas alias Taghoy, Commanding Officer sa Sentro de Grabidad, GF 51 samtang padayon pang ginaila ang namatay nga kauban niini, gani arestado usab ang Amasona nga giilang si Jessa Lumana.
Dugang niini, giila usab ang samaran sa bahin sa tropa sa gobyerno nga si CPL Kenneth James Balicot sa 5th scout ranger company hinuon anaa na sa luwas nga kahimtang ang maong sundalo.
Narekober sa kasundaluhan ang m16 rifle, 3 improvised explosive devices, 2 rifle grenades, ug mga subersibong dokumento.
Daling miikyas ang maong grupo sa encounter site diin padayong panawagan karon sa kasundaluhan ngadto kanila nga mu-surrender ug mubalik nalang sa sabakan sa gobyerno.
RadyoMaN Renz Barbarona
