Padayon karon ang Provincial Health Office/PHO sa probinsya sa Sarangani nga mabatukan ang dengue katugbang ang mga municipal og barangay health office, municipal hospital og mga partner organizations.
Niaging Hulyo 15, ni-deklara ang Department of Health og national dengue alert sa tibuok Pilipinas tungod sa daghang kaso og kamatay tungod sa dengue. Kagahapon, adlaw nga Lunes, atol sa flag raising sa Kapitolyo sa Sarangani, gikumpirma ni Mr. Federico Yadao, ang nanguna sa PESU kon Provincial Epidemics Surveillance Unit sa PHO Sarangani ubos sa pagdumala ni Doctor Arvin Alejandro, nga takdang mu-deklara ang DOH og national dengue epidemic tungod sa gidaghanon sa nataptan sa maong balatian nationwide.
Nag-deklara na matud pag dengue outbreak ang probinsya sa South Cotabato og North Cotabato. Anaa sa 0.48% ang fatality rate sa Sarangani Province, maong padayon ang pagpaningkamot nga dili kini mulagpas sa acceptable level nga one (1) percent.
Una nang naka-andam ang mga health personnel sa Sarangani tungod sa datus nga na-obserbahan nga matag tulo (3) katuig daghang maigo sa sakit nga dengue, susama usab kaniadtong tuig 2016, dili lang sa Pilipinas kundili sa tibuok kontinente sa Asya.
Pinaagi sa pondo sa calamity fund sa Kapitolyo pinaagi sa council chairman sa PDRRMC nga si Governor Steve Chiongbian Solon kaabag sila Vice Governor Elmer De Peralta, mga board member, mga mayores og barangay kapitanes, sa pagsuporta nila Senador Manny og Congressman Ruel Pacquiao, tanang munisipyo sa Sarangani lakip na mga municipal hospital, ang niagi pang mga tuig na-ayudahan sa mga fogging og misting machines magamit sa pagpang-spray.
Anaa pud ang DOH aktibo nga naghatag og mga kemikals/larvicide aron dili mabuhi ang mga kiti-kiti og ang mga insecticide-treated nga mga kurtina-moskitiro dili masudlag lamok ang mga panimalay og eskwelahan.
Apan mas epektibo sa gihapon matud pa ang paggamit sa istratihiya sa DOH nga “Enhanced 4S” aron malabanan ang dengue virus. 4S, upat ka S, buot pasabot: search and destroy mosquito breeding places, self-protective measures like wearing long sleeves and use of insect repellent, seek early consultation on the first signs and symptoms of the disease, and say yes to fogging if there is an impending outbreak.
Kung walay tubig, walay mudaghan nga lamok, maong dapat matud pang tabunan pirme ang mga nakapondong tubig o dili ba kaha iyabo og limpyuhan ang mga kanal. Ganahan mupuyo ang dengue-carrier sa mga limpyong tubig.
May memo na ang DepEd Sarangani nga nagtugot sa mga bata nga musuot sa eskwelahan og mga long sleeve og tag-as nga mga medyas pang-depensa sa paak sa lamok. Dapat usab suportahan sa mga residente ang ginabuhat nga pag-fogging. Samtang, paspas pud magpa-kunsulta sa mga nabatyagan. Critical period matud pa ang unang pito (7) ka adlaw gikan sa paghilanat.
May gibutang na nga “priority lane” ang matag municipal hospital sa Sarangani Province aron kadtong gituuhan nga naigo sa dengue ang paspas matagan og medikal atensyon. Nag-una ang Maitum nga adunay pinakadaghang na-dengue, gisundan sa Glan, ikatulo ang Maasim, og ikaupat ang Malungon.
