Davao City – Nabutang sa kontrobersiya ang Davao Base American Biologist ug Bone Collector nga si Darrel Blatchley human mikaringga ang City Environment and Natural Resources Office ug ang usa ka Barangay kapitan sa Boulevard area tungod lamang sa iyang pagboluntaryo sa paglimpyo sa kanal nga napuno og basura kay alang kanila daw insulto kini hilabi na nga napost sa facebook ang mga hulagway sa ilang paghakot og mga basura.
Ang pagbara sa kanal tungod kadto sa mga basura nga maoy rason kung ngano masinati ang pagbaha sa Bucana panahon nga magbundak ang uwan apan walay nagpakabana butang nga nagtukmod kang Darrel nga unhan ang paglimpyo sa paglaum nga musundog ang tanan sa iyang gibuhat.
Nadiskubrehan ni Darrel nga sagad sa mga basura nga ilang nakuykoyan sa kanal mao ang mga produkto nga gama sa plastic sama sa shampoo, junk food, bottled water, ug uban pa kansang delikado sa panglawas sa tawo, sa dagat, ug sa kinaiyahan.
Kini nagpasabot nga adunay kamatooran ang gipagawas nga survey nga ang pilipinas ikatulong nasud sa tibuok kalibutan nga ga-produce og milyong toneladang plastic gumikan sa mga kumpanya nga gamanu-factured og pagkaon, tubig, sabon, ug daghan pang uban.
Walay problema ang paggamit og plastic sa mga produkto kung ang mga kumpanya ug ang mga tawo kun responsable sa paglabay sa mga wrapper ug bottled of water sa saktong basurahan apan ang subo kay bisa’g asa ra ginabalibag maong maadto sa kanal ug sa dagat.
Kumento ni Darrel, daw kuwang sa paghigugma ang mga Pilipino sa nasud kay kung may pagpakabana pa wala unta sila nahimong mapasagaron sa paglabay sa basura labaw na ang mga plastic luyo sa kasayuran nga maghatud kini og dakong kadaut sa kinaiyahan.
Ang ka-walay aksyon sa mga barangay opisyal ug sa mga ahensiya sama sa CENRO sa pagbutang og ngipon sa implementasyon sa balaud sama sa waste management dakong factor kung ngano walay disiplina ang kadaghanan sa mga Pilipino ug pagsilot sa mga kumpanya nga ga-produce og plastic.
Busa gihagit sa langyaw ang tanan nga panggaon ug ampingan ang kinaiyahan sa Pilipinas samtang dili pa hingpit kuntaminado sa makamatay nga kemikal sa mga plastic ang kinaiyahan tungod lamang sa pag-pataka og labay sa mga basura.
RadyoMaN Joel Viray
