PALO, Leyte – Igintindog na han PNP Regional Office an tinatawag nga “Environmental Jesus”, an imahe ni Kristo nga ginraysang pero ini in nahimo tungod han mga materyales nag nakompiska durante han police operations, scraps ngan mga debris han nakalabay nga bagyo.
Ginpangunahan ni Outgoing PNP Region 8 Director PCSupt. Gilberto Cruz an unveling han imahe kaparte han adbokasiya han PNP nga magtuman hin balaud ha pangkalibungan.
An mga materyales nga gingamit para matindog an imahe ni Jesus Christ in 6 rifles nga napresenta han unom nga probinsya han sinirangan bisayas, duha nga chainsaw nga ngapapakita nga komitado an Police Regional Office ha mga tawo ngan pagdiri han man-made destruction.
Mayada liwat lima nga mufflers nga napresenta han lima nga environmental problems ha Pilipinas sugad han polusyon, global warming, overpopulation, natural resources depletion ngan waste disposal.
An mga nakompiska gihapon nga materyales han PNP sugad han 16MM mortar ngan rifle grenade, 365 nga nakompiska nga pistol para maporma an lawas ni Jesus Christ.
Nag-install gihapon an PNP hin solar-powered lights para mapahayagan an area ha kagab-ihon.
Nahihimutang an ‘Environmental Jesus’ ha igbaw han bukid ha Police Regional Office ha Camp Kangleon, Palo, Leyte.
