Davao City – Mas angay una tudluan ang katawhan kabahin sa proper waste management inay mangita og bag-ong dumpsite.
Sa pakighinabi kang Kinaiyahan Foundation Inc. executive director Betty Cabasares sa tulumanong ‘Straight to the Point’, iyang gituhuan nga mahurot lang ang mga lugar sa syudad sa pagpangita og bag-ong landfill apan kung dili makumbinse o wala matudlo-i og tarong ang katawhan sa proper waste management, mamahimong kawang lamang ang tanan.
Gipasabot ni Cabasares nga ang ‘waste-to-energy’ system sama sa Europe karon dili angay i-montar dinhi gumikan maka-apekto lamang kini sa atong kinaiyahan ilabi na sa katawhan gumikan sa pag-apil og sunog sa mga recyclables.
Dugang sa environmentalist, makahatag usab og kabalaka ang maong proseso sa panginabuhi diha sa mga tawo nga anaa sa gitawag nga ‘informal waste sector’ o ang pagpangalkal og basura silbing panginabuhian.
RadyoMaN June Duterte
