Davao City – Nag-unang hinungdan ang social media sa pagtakboy sa sakit nga depresyon sa mga kabataan sa nasud maong wala na matingala ang mga eksperto sa kinaiya ug panghunahuna sa anunsiyo sa World Health Organization (WHO) nga usa na ka milyon sa mga batan-on ang nakasinati og depresyon.
Nagtoo si Philippine Mental Health Association (PMHA) Davao Chapter Executive manager Precious Manliguez nga posible lampas pa sa usa ka milyon sa mga kabataan ang nagbaton og depresyon gumikan lagmit dunay mga lugar sa nasud ang wala maabot sa pagsuta sa mga eksperto.
Gani, segun ni Manliguez nga dili lang pagdaot sa pagbati ug emosyon kun depresyon ang ihatag sa social media ngadto sa mga kabataan apan lakip na mga sakit sa panglawas sama sa diabetes ug subo palandungon nga daghan ang wala masayod sa kumplikadong epekto sa mugnaon sa social media sites.
Sumala ni Manliguez, sagad sa mga kabataan nga nagkasakit og depresyon nag-edad og 14 anyos pataas ug ang ilang pagbati huyang kaayo nga kun makulangan gani sila og appreciation sa ilang mga ginikanan dayon sila muadto sa social media aron ilang pangitaon ang katagbawan sa pagdayeg nga ilang gusto makuha apan ang problema kun pulos negatibo ang ilang mabasa mahitungod kanila musangko na kini sa depresyon.
Ang kuwang nga pagtagad ug ka-walay pag-appreciate sa mga ginikanan ngadto sa ilang mga ginikanan maingon man ang pagtugot sa mga kabataan sa taas nga oras sa paggamit og social media ang pinaka-rason ngano nakasinati og depresyon ang kadaghanan sa mga batan-on karon.
Maong tambag ni Manliguez ngadto sa mga ginikanan mao nga taas nga panahon ug oras ug did-an ang ilang mga anak nga manghinobra ang ilang oras sa exposure sa social media aron makalikay sa sakit nga depresyon ang ilang mga kabataan.
Dugang tambag niini nga kung mamatikdan na gani ang pipila ka sintomas sa depresyon, dili kini pasagdan ug dugayon pa ug dad-on na sa mga eksperto aron madapatan dayon sila og tambal nga mao ang counseling aron sa ingon maluwas pa sila gikan sa ibiling domino effect sa depresyon sa kinabuhi mga kabataan.
RadyoMaN Joel Viray
