Manunumduman nga an mao nga eskwelhan in nag-aagi hin ayat tikang pa han nakalabay nga mga tuig tungod nga an tuna nga gintitindogan in gin-aangkon nga gin tatag-iyahan hin usa nga pribado nga pamilya.
Sumala kan School Head Herbert Del Pilar, nagpapadayon pa an kaso ha korte hiunong han “land ownership dispute” nga problema han ira eskwelahan.
Ine daw nga problema in dako na an nagin epekto ha kabug-osan nga operasyon han ira eskwelahan tungod han ginbuhat nga panguba han pribado nga pamilya ha pira nga mga estraktura han eskwelahan.
“Damo an panhitabo sugad han pananggal han sim nga nakapalibot ha amon eskwelahan ngan pag tibag han mga pader,” sumala kan Del Pilar.
Ha luyo hine nga panhitabo, nanindugan an DepEd nga mao nga tuna in gin-donar na han LGU han Burauen ha Department of Education dida han tuig 2021.
Pero ine in gintipahan han pamilya Pacala tungod nga waray daw legal nga basehan nga donar na han ira pamilya an tuna ha LGU Burauen.
Ha interview han RMN kan Rebecca Pacala, nga dida han tuig 1966 an iya tatay in nagkaada hin Memorandum of Agreement ha LGU Burauen nga ighahatag nira an 1800 sq. meters nga parte han ira tuna kun mahire kumo magturutdo an iya nanay.
Pero ine daw nga MOA in waray katuman salit dire matatawag nga legal an pag-angkon han LGU Burauen han mao nga tuna.
“Mayda namon nga dokumento nga nagpapakita nga waray namon kahatag an tuna. Mayda gihapon kami papel nga kinakaptan nga kinahanglan na hira mag voluntary demolition na tungod nga more than 50 yrs na an ira pag-inukoy without compensation ngan illegal iton public nga magamit hin private property,” sumala kan Rebecca.
Ha luyo naman nga bahin, agud naman masiguro nga hapsay an pag abre han klase kakulop nga adlaw, gin bisita ni School division superintendent Dr. Marissa Magan eskwelahan.
Personal nga iginkaistorya ni Magan an mga estudyante ngan pira nga mga kag-anak ngan nanawagan ha mga hine nga dire mahadlok ha natatabo nga sitwasyon ha ira eskwelahan tungod nga ine in ginpapanginano na han DepEd.
Nanawagan hi Magan ha pamiya Pacala nga hulaton nala an magigin desisyon han korte ugsa magdumara hin bisan pitad kontra ha eskwelahan.
Agud naman nga masiguro an seguridad ha lugar, an mga kapulisan han Burauen MPS in naka duty ha mao nga eskwelahan.
