Davao City – Nakadawat ug managkalahing opinyon ug reaksyon sa katawhan sa syudad sa Davao ang istilo ni Ozamiz City Chief of Police Chief Insp. Jovie Espenido.
Sa morning primetime radio social commentary program nga ‘Straight to the Point,’ gibatbat sa pipila ka mga lungsuranon nga naka-uyon sila sa pamaagi ni Espenido sanglit drug personalities man usab ang pipila nga nangaligdas atol sa mga police anti-narcotic campaigns sa nasud.
Ikaduhang rason mao nga tama lamang nga panalipdan sa kapulisan ang ilang kaugalingon sanglit ang mga dagkung pangalan nga involved sa drugs sagad armado kini ug andam usab magpakamatay kun ma-corner sa mga tinugyanan sa balaud.
Kahinumdoman nga duha na ka mga mayores ang nitikangkang sa mga dapit diin nadestino si Espenido giila nga sila si Albuera Leyte Mayor Rolando Espinosa ug Ozamiz City Mayor Reynaldo ‘Aldong’ Parojinog.
Ulahing gikatakdang ma-assign si Espenido sa Iloilo City PNP ubos kang Mayor Jed Patrick Mabilog kinsa nalakip sa drug matrix sa mga narco-politicians nga gihuptan ni Duterte.
Hinoon, ang appointment sa kontrobersyal kaayo nga police officer wala mahinayon gumikan sa wala pa masayring hinungdan.
Sa listahan sa pamuno-nasud, giila ang Iloilo nga ‘Most Shabulized Province’ gumikan sa paghitak sa drogas ug involvement sa daghang mga tawo diha sa maong sinindikatong buhat.
Sa pikas bahin, gipikhan karon ni AKBAYAN Partylist Rep.Tom Villarin si Espenido gumikan sa iyang istilong pagkutlo sa kinabuhi sa mga high-profile targets sa war on drugs.
Matud ni Villarin, gibati ug kabalaka ang pipila niya ka mga kakaubanan sa Kongreso gumikan sa padayong kamatay sa pipila ka mga tawo ilabi na kadtong gihulagway nga nisukol sa mga awtoridad kun gitawag nga mga ‘nanlaban’ cases.
Dugang ni Villarin, angayan lamang nga mag-vigilar ang katawhan sa mga higayon diin adunay kinabuhing makalas ilabi na kun tataw nga nalapas ang ilang mga katungod ubos sa balaud.
Kasamang June Duterte
