ILOILO CITY – Ginkumpermar ni acting city mayor Jose Espinosa III nga may mga barangay officials nga natumod bilang high value target (HVT) kun illegal nga droga ang hambalan.
Suno kay Espinosa ini ang ginkumpermar mismo sang Philippine Drug Enforcement Agency (PDEA) sa pinakauna nga City Peace and Order Council ukon CPOC meeting nga iya ginpangunahan.
Subong man ginpahayag ni Espinosa nga indi pa pwede marelease ang ngalan sang mga natungdan nga barangay officials tubtob wala sang maid-id nga beripikasyon kag mabakod nga ebidensya.
Ginbuyagyag man ni Espinosa nga may walo ka barangays sa syudad nga malala ang affectation sang illegal nga droga apang wala niya ginhingalanan.
Naggwa man sa data sang PDEA nga may pulo ka barangays nga un-affected sang illegal nga droga kun sa diin may anom na nga nagasubmit sang dokumento nga ginalakipan sang barangay Libertad-Santa Isabel sa Jaro, Banuyao sa La Paz, kag San Jose , Ed Ganzon, Sampaguita kag Osmeña City Proper.
