Nakaangkon ug kadaut ang pipila ka sakyanan nga gidisplay sa Hilton Motors iya sa kontrobersiyal nga negosyante nga si Peter Lim human adunay niulbo nga improvised explosive device kon IED gawas sa establisamento .
Nahitabo kini kaganinang alas 2:15 sa kadlawon sa dalan M.C. Briones, Barangay Subangdaku sa dakbayan sa Mandaue .
Ang establisamento nagtinda ug mga imported nga sakyanan apil na mga truck ug heavy equipment .
Ang Subangdaku Police Station nakadawat ug tawag labot sa niulbo nga iksplosibo sa gawas sa Hilton Motors nga nahimutangan usab sa opisina ni Lim .
Daling nirespondi ang kapolisan ug padayong nag-imbistigar karon kung kinsay responsabli sa pagbutang sa niulbo nga iksplosibo .
Sa niaging semana , adunay nisuway usab sa pagsunog sa Infinity KTV and Music Lounge nga iya sa managsoong Peter ug Wellington Lim sa Archbishop Reyes Avenue sa syudad sa Sugbu.
