El policia na ciudad de Isabela formalmente ya planta ya caso na corte contra con el un studyante con quien ya pwede sila aresta del sabado por la noche na barangay de Sta. Cruz, durante el un buy bust operation.
Asegun kun Senior Inspector Sonnyboy Perez, hefe del Drug Enforcement Team del Isabela City Police, violasyon del section 5 y 11 del acto republica 9165 amo el kosa ya recommenda sila na corte contra el suspechao conosido como si Ivan Roe Patrimonio.
Si Patrimonio ya sale arrestao despues pretende coneste cumpra el un ahente del drug enforcement team encambio con el 500 de pesos cen.
Ya pwede recubri na kwarto del suspechao donde este ta arkila amo el tres pakete de alegao shabu, 4 rolyo de foil y otros maga paraphernalias.
Asegun con Perez, si Patrimonio amo el alegaomente quien ta bende droga con maga estudyante na ciudad.
El suspechao nativo del Barangay Port Holland na municipalidad de Maluso y temporariamente ta arkila lang kwarto na un boarding House na barangay Sta. Cruz.
Fourth-Year Graduating Student si Patrimonio na Claret College of Isabela y ta saka el Curso de Bachelor of Science in Information System.
Mientrastanto el suspechao ta esta pa siempre detenido na celda del Isabela City Police office despues pirma este dies dias waiver para contesta con el alegasy0n que ya planta kunele el policia.
