Davao City – Kasong murder ang atubangon sa 42-anyos nga lalaki human dunggaba ang iyang kaugalingong pag-umangkon sa Purok Laging Handa, SDA Road, Barangay Zone 2, Digos City, Davao del Sur niadtong Marso 11, 2021.
Sa interbyu sa DXDC RMN Davao sa personahe sa Digos PNP, giila niini ang biktima nga si Xena May Cabaid 19-anyos, estudyante, ug residente sa maong lugar. Ang suspek mao si Jacklord Reveyra, 42-anyos, diin nanimuyo lamang sila sa usa ka balay.
Matud sa pulis, pinaagi sa pamilya adunay psychological ug behavioral problem ang suspek ug kanhi napriso sa Davao Prison and Penal Farm o kanhi Davao Penal Colony (DaPeCol) tungod usab sa kasong stabbing.
“Ang motive niya kay dili ‘mi maka-conclude kay naa man gud siyay psychological behavioral problem. Unya ang history sa suspek kay niagi ni siya og kapriso sa DaPeCol,” segun sa pulis.
Una niini, nakahiagom og samad dinunggaban ang biktima ug nagbuy-od na sa kusina sa ilang balay samtang naghigda na sa sofa ang suspek nga gitoohang lango sa ilimnon nga dali usab nga naaresto sa otoridad. Narekober sa crime scene ang usa ka kitchen knife ug duha ka cleaver knives nga maoy gigamit sa krimen.
RadyoMaN Kirby Manzon
