Pagadian City – Nagpa-alim karon sa pribado nga ospital ang 25 anyos nga estudyente human kining gipusil sa gitoohang mga tulisan niadtong nakalabay nga gabii dihang dapita sa F.S Pajares Streer partikyular sa atubangan sa Parole and Probation Office.
Giila ang biktima nga si Jeff Jazzylle Luy, ulitawo og residente sa Purok Santan A, Brgy. San Jose ning syudad.
Sumala sa sulti sa inahan sa biktima nga si Erlinda Luy, nagbaktas matud pa ang iyang anak kauban sa hinigugma niini nga nailang si Quinee Mar Tolentino apan sa ilang pahidangat sa nahisgutan nga lugar kalit nga nihunong sa ilang atubangan ang usa ka single motor, diin nisita ang sakay sa motorsiklo nga ihatag ang cellphone ug kwarta sa mga biktima.
Nibalibad ang manag-oyab sa pagtunol sa gipangayo sa tulisan uban ang pangatarungan nga wala silay dalang kwarta apan nagdumili sa pagpaminaw ang mga suspek og diha-diha gipusil ang biktima sa iyang too nga paa.
Blangko pa ang kapulisan sa pag-ila sa mga suspek nga daling niikyas paingon sa wala matino nga lugar human sa hitabo.
