Davao City – Nabalot sa samad dinunggaban ang lawas sa estudyante human gitabangan og luba sa letsonero ug karpentero gamit ang icepick.
Ang biktima giila nga si Johnny Zamora, 26 anyos, estudyante, nagpuyo sa Jade Valley, Buhangin, Davao City, samtang ang mga suspek mao sila si Edgar Ramirez ug Vincent Danila nga pulos nagpuyo sa Panacan, Davao City.
Nasuta sa imbestigasyon sa Homicide and Arson Section sa Sasa Police Station, samtang nagbaktas ang biktima sa Tierra Niño Subdivision, Panacan, kalit miduol ang mga suspek ug gipareglahan ang biktima pasado alas 2:00 sa kadlawon.
Unang mibunot og icepick si Ramirez ug gidunggab si Zamora pila ka higayon. Nakadagan og pila ka metros ang biktima apan gigukod kini ni Danila ug dihang naapsan gitiwasan og luba ang biktima.
Ang mga suspek dayon misibat human sa krimen nga ilang nahimo.
Maayo na lamang kay dunay nakasaksi sa panghitabo nga maoy nagtug-an sa kapulisan sa mga suspek ug sa gihimong follow-up operation malampuson nasikop si Edar samtang si Danila nakalayas.
RadyoMaN Joel Viray
