Dumangas, Iloilo – Ginpahayag ni Elmer Decilao, 22 anyos sang barangay Ermita, Dumangas nga wala siya sang intensyon nga patyon ang kasubong nga estudyante nga si Willy Amihoy, 23 anyos sang Ilaya Taysan, Negros Oriental sa boy’s dormitory sang Iloilo State College of Fisheries – Dumangas campus sang Marso 11.
Suno kay Decilao, na-impito siya sa panabat ni Amihoy sang nag -istoryahanay sila angut sa pagpasibangod sang biktima nga siya ang nagkawat sang wallet.
Dugang pa ni Decilao nga pilit siya nga ginapaako sang biktima sa butang nga wala niya ginhimo rason nga nagpalanulom ang iya panulok kag iya ginlampusan sang tubo si Amihoy sang makapila ka beses.
Nagpangayo sang pasaylo si Decilao sa pamilya ni Amihoy kag nakahanda siya nga atubangon ang konsekwensya sang nahimo nga krimen .
“Gapangayo gid ako sang patawad sa pamilya yah nga nahimo ko to. Indi ko man gid to hungod. Waay ako intensyon nga amo to ang himuon ko . Naghinulsol gid ako nga nahimo ko to. Tungod sa kay nahimo ko to, indi na ako maka-graduate subong, ” pahayag ni Decilao.
Nahibaluan nga graduating sa kurso nga Bachelor of Arts in Education si elmer decilao.
Preso sa Dumangas PNP si Decilao kag suno kay PO3 Ronald Domines, desidido nga magpasaka sang kaso ang pamilya ni Amihoy.
PHOTO CREDIT: RCfm Dri Lingaw Ka
